小紅館 (已結業)

觀塘出名多好嘢食，不過最近朋友介紹，話呢間餐廳嘅雞煲好好食，咁就打算約埋班朋友嚟試吓啦。不過一嚟到，又比佢其他小菜吸引咗，咁就決定一齊叫幾個小菜分享，下次先再試雞煲啦。因為佢嘅雞煲星期一至四會半價，咁就梗係等星期一至四先來食啦。而且見到隔籬枱嘅小菜好似都好正，睇落已經好有鑊氣，所以都係試咗小菜先。我哋叫咗個二人餐，佢有粟米羹送，竟然仲要好大碗。我哋五個人一人飲咗一碗仲有剩。而且仲有嘢飲同白飯送，所以呢個二人餐好抵。我哋叫咗好多唔同嘅小菜，我自己就覺得最好食嘅就係呢個蜜椒薯仔牛柳粒，佢嘅牛柳粒食落好高質，咬落唔會太硬又唔會太冧，而且好有牛味，同埋佢好香口好啱送飯。而呢個辣子雞我朋友就讚不絕口，雖然佢係唔鍾意食辣嘅人，但係佢話佢嘅香辣味啱啱好，又唔會蓋過啲雞既味，而且雞肉都炸得好脆，外脆內嫩。呢間餐廳又平又抵食，而且仲成日有優惠，唔怪得次次經過都見到佢坐滿客人啦。