曜 (已結業)

上網搵左好耐，見到呢間日本餐廳大家都推介係非常高質，我一於襯放假走去試吓。第一次去到感覺好寬敞，我哋鍾意坐吧枱可以見到師傅整嘢食，午餐有好多選擇，不過因為第一次嚟我哋通常都唔會揀最貴，今日唔係咁想食生嘢，所以試咗兩款，價錢可以接受，但味道就非常之有驚喜。我哋叫咗兩款套餐，已經包括左前菜，主菜同湯。精美嘅餐具真係可以令人提升食慾，蟹肉蒸蛋非常嫩滑，除咗有蛋香之外加埋蟹油味道，非常好味。時令推介係蟹肉鮑魚烏冬，開頭以為係普通烏冬，點知見到成吋厚嘅烏冬片，師傅建議食法，先可以用清湯食，飲埋個湯，或者將蟹肉撈埋烏東一齊食，兩款食法都好好味，好有創意，當然用蟹肉撈埋食，味道更加香濃，配埋醬汁鮑魚，成件事好高級亦都非常有特色。鐵板燒和牛定食，最主要一定係和牛夠靚夠香濃，和牛入口即溶，油脂好豐富，牛肉味好重，配埋炒飯食好香，炒飯炒到一粒粒，食得出嘅功架，最後飲埋碗齒頰留香嘅魚湯，好香濃好好味，真係超驚喜，食物勁高質，下次一定要試埋其他唔同嘅食物。