越星越南料理 (已結業)

食好嘢，除咗要用心發掘，仲有講緣份，今日去深水埗買嘢，又熱又攰，突然間想食碗麵飲杯凍嘢，行到燈位見到有間未試過嘅越南餐廳，仲有下午茶餐食，姑且去試吓。 餐廳裝修簡約光猛，但店面管理比較散漫，尤其出品位雜物堆積，可能係預備晚市，所以忽略咗店內情況。試食越南菜，除咗春卷外，食生牛肉河最能夠測試厨師實力。因為每間越南餐廳都必定提供呢兩樣食品，亦都係客人HIT RATE最高嘅ITEM。 生牛肉檬粉跟椰汁冰$35先讚吓個粉，湯夠熱，多葱多辣椒，但僅此而已。湯頭太鹹同味精，完全飲唔到牛肉鮮味，牛肉無味又唔鬆化，食得好吃力，檬粉煮得太腍，一夾就散，唯有撥落匙羹食，而且無其他香料例如九層塔嘅香味，已經唔可以稱得上係合格嘅越南粉。椰汁冰，顧名思義就係椰汁加冰，用糖調味，但呢杯嘢冰唔夠多，椰汁有色無味，仲要熱辣辣沖落杯冰度，其實就係飲緊一杯涼嘅淡椰汁味飲品，只有死甜，沖呢杯嘢嘅人可謂藝高人膽大，就都夠膽比客飲。一分錢一分貨我名，但同樣嘅料只要烹調得宜，一樣可以做出好食品，但人為失誤導致浪費食物就令我深痛惡絶，希望厨師正視問題，莫因下午茶利潤少就等閒視之。