喜越 (已結業)

A姐話近期香港好似多咗好多越南餐廳，計我話只係因為佢之前只鍾情日韓菜系姐。唔知大家有無覺得每次食到一碗熱辣辣又濃香嘅牛河，其實真係好幸福架！今日我哋去到銅鑼灣耀華街食越南菜小店：喜越，一於試試又啱唔啱口味先啦！食越南河，最重要就梗係個湯啦！湯底充滿香濃嘅牛肉味，最重要係唔會係死實實嘅味精味，而綜合牛河都算足料，有生牛肉、牛丸同牛展。牛丸爽口彈牙，不過因為切咗半，所以無咗爆汁嘅感覺；而牛肉同牛展好軟腍，肉味香濃。當法包遇上咖哩汁，令一向乾身嘅法包索晒咖哩，真係另一享受！越南咖哩唔辣，仲帶有香茅同椰奶嘅香味，雞肉嫩滑，仲有入晒味嘅薯仔，好滿足！芥蘭苗份量唔少，夠新鮮爽脆，而蝦米仔嘅香味，令芥蘭苗嘅香味大大提升。淡淡嘅香茅味，配上蜂蜜真係好滋潤養喉。同一般嘅菠蘿冰唔同，呢度嘅菠蘿打到半碎，所以每啖都飲到菠蘿肉，好香又唔會太甜。