Fûhn (The L. Square) (已結業)

銅鑼灣好多嘢食，今次試咗一間越南菜，都幾好味，尤其係湯粉個湯，好鮮。香茅雞扒湯粉，$78雞扒大大份，分開上，所以保持香脆，香茅味唔太重，可以加啲辣醬食更好味。重點係湯，好鮮好鮮，河粉好滑，一啖接一啖，食到停唔到口。安格斯牛肉撈檬粉加太陽蛋，$88牛肉味都重嘅，不過冇乜落調味料，所以我加咗啲甜辣醬，檬粉已經加入魚露，撈勻就可以直接食，味道同平時食嘅有啲唔同，冇咁酸，不過都好味嘅。軟殼蟹米紙卷，$88鍾意呢度嘅米紙，唔係透明嗰款，比出面食到嘅煙韌，口感好好，不過呢度係點千島醬，唔係平時嘅魚露，幾特別。鹹蛋黃雞翼，$68朋友最鍾意食雞翼，任何嘢加入鹹蛋黃去炸都好味，不過真係好邪惡。另外值得一提係佢嘅椰子冰，唔會好甜但係充滿椰奶味，夏天飲真係一流。