早安越南 (已結業)

呢排喺社交平台見到好多朋友去左越南旅行，繼續要翻工既我唯有留喺香港食住越南菜止下癮先啦。嚟左黃埔既早安越南，見到裝修都好新朝，出面呢架車仔仲有出售越式調味料同飲品。食物方面，二話不說點左個Pho，今次要左香茅豬頸肉河。由於同行朋友唔食芫茜蔥，所以先全走，但個湯底清得黎都好夠味，而且碗粉好大，一個人食哂都幾飽肚。至於豬頸肉完全唔油膩，外層好香脆，份量好多，但都通通食得哂！朋友就要左海南雞飯，呢度冇得一set咁叫，要單叫例牌海南雞另外再加飯。先講海南雞，雞肉好嫩滑，雞皮好爽，完全唔油，加上三寶，黑豉油薑蓉同埋辣醬，正！至於另外叫嘅飯，可以要白飯或者荷葉蒸雞油飯，食海南雞當然要油飯啦，但老實講呢度既油飯令我有少少失望， 份量好細唔太足夠，而且唔夠雞油香味，下次都係普通白飯就得。最後我哋仲要左一碟馬拉盞炒通菜，夠晒鑊氣而且好多馬拉盞，加埋炸蒜片，好香，值得一食。呢度上菜好快，而且服務態度都好好。而且食越南野有時好怕食完之後好口乾，但係呢度冇，證明唔會太重調味/加左味精。