新南苑私房菜火鍋鷄煲 (華僑商業中心) (已搬遷) 新店位置

為慶祝本大少病完，今日要食雞煲大拆一餐！新南苑口卑不嬲唔錯，決定一試。九點去到，好滿座，不過等左五分鐘就有得入座。一坐底已經有前菜等候住，怕餓親客仔。花生脆口夠香。椒泡雞腳好好味！少少辣，但皮又爽得黎唔會好難咬開。四季豆則過辣。湯底五款可選，決定要個特別d既滋補野生水魚湯底。湯底係藥膳湯底，紅棗杞子玉竹元肉等等，另外水魚原隻上。海鮮拼盤有鮑魚，蟶子，帶子片，蝦，蠔，魭魚片，斑片同甲殼類。蟶子同貝殼都好大隻，好驚喜，非常鮮甜，不過有少許沙。帶子如果係原隻唔係片會更好，而家太薄同雪得太實，好難掌握點先熟而唔會過老。鮑魚淥五分鐘已經夠念，太耐會咬唔入咖！這是蝦。蠔好大隻，熟左都咁大lol斑片有晶瑩既皮，係我既最愛，雖然係任叫項目上面，不過九點半就已售罄... 我坐底半個鐘咋，冇得encore TT魭魚片淥十秒好拎返上黎，唔係就太老咖啦！果然係脆魭！平均而充分既魚脂分佈令魚片香而爽口，加上厚切雙飛，非常有口感。上等手切牛頸脊，只有一碟，可加$30再叫。其實都抵叫！牛肉脂肪唔高，但食落口都非常嫩滑而且充滿牛香！好多顏色既丸類，但其實食完隻水魚已經飽左一半，再食埋海鮮拼盤已經飽到上心口，只能淺嚐。