第一郡 (已結業)

今日本來同太座去銅鑼灣維園打網球，撞正落雨，認真掃興，唯有同太座去銅鑼灣行一陣，然後揾吓邊間餐聽食晚飯。因為幾個星期前我地去完越南旅行，好掛住當地嘅美食，所以老婆建議再去食越南菜回味一下。於是就喺天后威菲路道揾到一間個名好特別，叫（Q1 第一郡）嘅越南餐廳我哋入去搵個位坐低，可能太早去到，所以人唔算太多。睇完菜牌後，我點咗個蟹膏番茄湯檬粉，佢嘅蟹膏餅好特別，開頭我以為佢俾錯咗炸豆腐俾我，但食落就感覺到香濃嘅蟹膏味道，豬紅又好嫩滑，扎肉入邊有胡椒辣辣地，一個字正。我又點咗個凍嘀嘀咖啡，咖啡味好香濃，侍應話係正宗嘅越南咖啡粉。我老婆就點咗個招牌菜Q1麵，佢話湯底好鮮甜，魚肚好彈牙，好有口感，帶子鲜味十足，跟住又點咗杯芒果沙冰，芒果加埋牛奶落去打得好滑，芒果味又好香濃。我哋又點咗個米紙蝦卷，加埋啲特別嘅醬汁，味道一流。最後嗌多個甜品斑斕綠豆糕，呢個綠豆糕好好味，我諗每個女士都會鍾意食，大嘅食咗個幾鐘先埋單走人。太太好滿意呢餐。