Masala Train (已結業)

今日夜晚要到灣仔會展，就決定早啲到，係附近搵間餐廳食個晚飯先，一出地鐵站，就發現左呢間印度小店。 見到餐牌有我最鍾意嘅卡巴，諗都冇得諗入咗去，哈哈。小店唔係好大，只有3個坐位，可以選擇外賣或者坐高櫈都可以。man($58)卡巴係即叫即整，整好之後由錫紙包住，拎上手仲係熱辣辣的，夠晒新鮮。因為我想影相嘅關係，就叫咗店員幫我分成兩半。卡巴入面有雞肉，蕃茄，生菜，洋蔥，青椒同醬汁。雞肉經過香料腌制， 所以呈橙色，食落好惹味好香，最令我驚喜嘅係， 雞肉口感好嫩滑，完全唔會鞋身！另外店員仲係卡巴入邊加左好多醬汁，食落唔會乾身，酸酸甜甜咁，夠晒惹味，不過個人就覺得醬汁嘅份量可以少啲。另外我仲加左＄10，轉成全麥餅皮，玉米皮口左煙韌，軟身，帶點甜味，大愛呢種玉米皮！作為一個胃口都唔細嘅人，食完咁足料嘅卡巴，都覺得有少少飽。係灣仔區，呢個價錢，咁足料，真係幾唔錯！絕對會再幫襯！Mango lassi($25)鐘意芒果嘅我，另外叫左杯Mango lassi。落單之後，見到店員加上芒果同冰粒去打，芒果味好濃郁，帶點乳酪味，仲隱約見到幾粒芒果粒，飲落好rich。