榮少喇沙 (已結業)

好掛住新加坡野食，就去屯門市中心果邊食個喇沙解下癮先~小店位於屯門時代廣場地下，店面唔大，多數係2-4人檯，店主似乎好喜歡Mirror，店內好多poster, 而且一路播住mirror嘅歌。餐牌有飯、麵同小食，當中應該係喇沙粉麵類最受歡迎。餐廳亦都可以用QR code落單，疫情之下減少接觸。豬軟骨喇沙非常之大碗（已經嗌左少麵），湯底係屬於咖喱喇沙，比較濃稠，有濃郁嘅椰香味。 我點左米粉，比較掛湯，而且湯入面有好多望落碎碎地、咬落有顆粒感嘅配料，叫做石栗，係一種馬來西亞嘅香料，好提味，唔係間間鋪頭都會用到。成碗粉好足料，有三大塊豬軟骨、四粒豆卜同半隻蛋。我另外加配左蘆筍同秋葵。豬軟骨煮得好腍，有滿滿嘅骨膠原。越南春卷脆卜卜但唔油膩，蝦係幾新鮮嘅，入面仲包左香葉提升清新感。有氣菊花茶第一次飲到有氣嘅菊花茶， 原來係香港本地製造嘅飲品，口味幾清甜，而且每100ml得23kcal, 好飲得黎熱量唔高。