大湯家 (已結業)

睇 app 見到呢間告急，專登走咗過去幫襯。未去到之前，仲以為燉湯店會好似譚仔咁格局傳統，成間店都係由啲阿姐打骰，點知原來係間裝修新派嘅小店。嚟呢度幫襯，燉湯當然係主菜，我揀咗 “男女恩物” 椰子烏雞排骨燉湯，而家晚市惠顧一客燉湯加十蚊可另選餐牌上任何食物，我唔太肚餓，冇揀到蒸飯，叫咗客吞拿魚飯卷。首先要讚下個燉湯，非常足料，我𡁻椰子，烏雞同排骨都𡁻到口軟😆，湯水份量亦非常多，未開盅蓋時，啲湯係滿到滲咗出嚟。味道方面，我覺得略為偏濃同偏鹹，如果輕手少少會更理想。至於個飯卷則無論賣相同配料都好平實，充滿住家嘅味道。臨走時，見門口有良心糖果可取，我拎咗條迷你萬樂珠，立刻啪咗一粒，甜甜嘅味道中和咗剛才燉湯嘅鹹味，口中甜，心更甜❤️。