芝心糖人街 (已結業)

去完嘉年華就落九龍城食飯, 貪呢邊多選擇. 食完晚飯朋友都仲未夠皮, 話要食埋糖水先走. 就是但響附近睇下有咩選擇, 見呢間有中西式糖水, 雪糕, 特飲咩都有, 一於試試.晚飯都食得幾飽, 所以都係要碗生果系統糖水清一清, 一來無咁飽, 二來玩左成日好口乾, 吸收返D水份. 要左個什果楊枝甘露($33), 份量好大碗, 好足料.什果包括有西瓜, 蜜瓜, 哈密瓜, 芒果, 款款都有幾粒, 加埋即係十幾粒, 食完都幾飽. 生果新鮮清甜, 芒果唔會太酸, 糖水底西米露夠晒淋. 糖水唔太甜, 加埋酸酸地既沙田柚肉中和下, 兩者剛剛好. 食完個人好清新醒胃, 減卻左食晚飯既飽濟感.