四爺車仔麵專門店 (已結業)

我有個朋友係好鍾意食車仔麵，幾乎我地每次約親出嚟個節目就係食車仔麵，今日又比我地發掘到一間又養生又足料嘅車仔麵店，食車仔麵會養生大家可能會覺得奇怪，但依到嘅老火湯真係滋潤又健康。淨係燉湯都好多款想試下。我叫咗花膠燉雞腳湯，入口清甜 無味精味，花膠大大件 雞腳又入味，飲落好有骨膠原 仲要好足料添飲完覺得好補呀。朋友揀咗薯粉 雞翼 魚蛋 牛腩。雞翼同牛腩好入味 啲肉又軟嫩魚蛋都好入味好彈牙 而且好有魚肉香。我嘅車仔麵就揀咗河粉 豬腩仔 豬大腸同牛肚，湯底揀咗皮蛋芫荽湯，芫荽味好重同好香 飲落順口 唔會太鹹，我飲咗一半都唔覺口渴，最緊要同河粉超夾。牛肚好食喎夠咬口又夠爽，最緊要係好濃味。豬腩仔好好食 我覺得必嗌佢入味之餘 肉質好軟嫩，肥瘦均勻 啲肥肉好正 入口好似即融咁，好推介豬腩仔！豬大腸好有咬口同醬汁好夾，大腸好乾淨食落唔會有太大豬臭味。