竹園海鮮飯店 (已結業)

肥肥家族其實不時都會出入跑馬地，只係家人從未幫襯過位於電車總站o既「竹園海鮮飯店」，適逢兩位長輩一同慶生，佢地就特意擇日請大家一試「竹園」馳名o既靚海鮮。步進餐店一刻，即可望到門外玻璃架上擺出名貴靚翅，好有氣勢。用餐大堂o既牆身貼有大大張印有中、日、韓三語o既彩圖廣告，相信食客不乏亞洲籍遊客。後方則掛出金絲百福圖，剛巧配合當晚個生日派對，真係好意頭。主人家一早已訂好多道菜，並安排好白酒、紅酒、及細佬最愛o既香檳，盛設非常！賓客到步不久，服務生迅即呈上多款香口醒胃o既小食如魚仔花生、青瓜、皮蛋等以作送酒之用。小食原來全為免費贈送，當中o既苦瓜雞腳、椒鹽豆腐、椒鹽茄子更是新鮮熱辣辣，前菜都咁有鑊氣，當真令人十分期待接著落黎o既海鮮菜式。秘製潮州翅：據悉，「竹園」雖則唔算係潮州酒家，但其「潮州翅」可謂鎮店名菜。嘩，翅品香濃足料，腍滑暖胃，食完一大碗都唔覺膩口溜滯，果真名不虛傳！避風塘瀨尿蝦：少食海鮮o既XO仔真係大鄉里，要人教先識得點去剪開啲瀨尿蝦黎食。微辣o既瀨尿蝦肉爽脆惹味，堅！蒜蓉粉絲蒸貴妃蚌：每人最少有一隻o既貴妃蚌爽滑非常，簡單以蒜蓉蒸煮已能吊出鮮甜，伴上o既粉絲吸盡貴妃蚌流失o既