上海弄堂菜肉餛飩 (綿發街)

營業中

休息中

今日去咗跑馬地，見天氣凍凍地就想食啲熱辣辣嘅中式嘢，所以就去咗上海弄堂。每位食客都會有一杯大麥茶，比普通中式茶多一陣香味。最近天氣轉變，感覺好乾燥，所以叫咗姬松茸豬展湯滋潤一下，燉湯好滋潤好補，飲完成個人即刻暖哂。我叫咗紅燒肉百頁結一人套餐，配脆皮春卷，春卷啱啱炸起，熱辣辣好脆口，而且用咗比較健康嘅蔬菜餡。紅燒肉百頁結嘅紅燒肉煮到好腍好入味，肥瘦適中，唔乾得嚟又唔會太多肥膏。之前未食過百頁結，質地有啲似腐皮。加錢轉咗個擔擔麵，上海弄堂嘅擔擔麵不嬲都好高質，少少辣好惹味，麵又夠彈牙，仲有好香嘅花生醬味。朋友就叫咗比較健康嘅嫩雞煨麵，有好多菜粒同雞粒，雞肉都夠嫩唔會乾。最後仲叫咗個小籠包，一上菜熱辣辣，蒸氣令到小籠包脹卜卜，皮夠薄，豬肉好肉地，肉汁同濃湯完美混合。