香港海賊王餐廳 (已結業)

跟路飛一起晚餐海賊王餐廳大小姐生日，諗左好耐同佢去邊度食飯。又要有啲公仔人物，但係又唔想來來去去食果幾間餐廳。所以，今日試吓一啲大人鍾意嘅卡通人物—海賊王 one piece 。經OpenRice訂枱，餐廳幫我預留左最近公仔嘅位置，兩個女都好開心。佢哋雖然唔知呢啲係咩公仔，總之有公仔陪就開心啦😂食物方面，我叫左星星薯餅：小朋友一定鍾意，熱辣辣，細細粒，好香口，加埋個芝士醬，好好食。正義牛扒三文治：份量好足夠，配埋薯條，大大份，仲可以揀牛扒幾多成熟，小朋友梗係食熟啲啦，我叫八成熟，但係都唔會好硬，個包仲要烘過，小小脆。蒜香大蜆意粉：啲蜆好大粒，而且都多，蒜香味濃，反而意粉好似唔多夠。草帽日式咖喱飯：個汁都有啲辣，小朋友未必啱，只可以食飯，不過個汁幾好食，仲有幾粒牛柳粒。索柏帽子蛋糕：好靚嘅粉紅色蛋糕，餐廳哥哥仲幫我點蠟燭，十分細心。不過餐廳真係多人，建議真係要book左枱先。用餐時間有限，不過1小時30分鐘正常係足夠嘅。