越味皇 (已結業)

荃灣路德圍上都幾多食肆，呢日想食越南菜。所以就揀咗呢間《越味皇》。餐廳裝修帶有越南風情，感覺舒服。越式柚子鮮蝦沙律 ($68) - 大蝦煎得香口，蝦肉彈牙有蝦味。配上大大塊柚子果肉，爽口青瓜絲及紅蘿蔔絲等材料，味道酸酸辣辣，香口健康之選。越式串燒雙拼(3串) ($88) - 雙拼分別係牛肉及雞肉，肉串表面燒得香口帶點乾身，裏邊仲可以保持到肉汁，口感唔會韌，蘸上滋味醬汁，就更好味！越味皇火車頭湯河 ($68) - 材料包括：生牛肉、熟牛肉、牛筋、牛丸，配以牛味濃郁嘅牛骨清湯底，味道唔錯。越式炸椒鹽軟殼蟹 ($72) - 一共有兩隻軟殼蟹，有蟹味唔會腥，口感香口鬆化帶點煙韌。咖哩牛腩煲 配蒜蓉包 ($78) - 咖哩汁惹味得嚟帶點辣，牛腩炆得夠腍，蒜茸包蒜香味濃夠鬆脆，食完仲想再食。椰汁綠豆冰 ($28) -  已剝殼嘅綠豆帶點咬口，配上香甜椰汁，都幾好味。泰國椰青 - 跟湯河只需$20，抵飲。