小洋蔥 (已結業)

今日去開果頭做野，對面大x活好多人要排隊，冇位，價錢只差10幾蚊倒，就入去試下。餐廳既環境唔錯，好似幾新，我記得3年前黎呢個地方都未有呢間野...?兩個人食，坐二人台，張台比較細，圓台，一個餐加杯野飲都冇咩其家位。餐牌上既午餐由54蚊到60蚊不等。我叫左個對面都有得食既鮮茄菠蘿豬扒焗飯，即係焗豬扒飯，加杯熱檸蜜。等左5至10分鐘d野食就黎左，果時出面已經有人排緊隊。講返個焗豬飯，睇落唔錯，足料既。有一塊豬扒，炒底飯，少量黃椒同青椒，有洋蔥，有幾舊罐頭菠蘿，拼埋我唸應該唔夠一個ring但多個半個。豬扒size，比較細，肉既部份細過手掌，一大條骨。同對面最大既分別係個醬。幾濃，夠酸味，見倒有茄肉既。食落冇問題既，夠熱，味道合格。夠料，所以算幾好食。有焗過既味道。分量都算可以，唔係好多，都算緊緊夠飽，大食既話就會唔夠。熱檸蜜，蜜味比較淡，檸檬有點苦(係，我係食檸檬既)，杯野差少少啦，只屬pass。午餐唔收加一，呢個價錢唔算好貴，但都唔係平，我記得前身係茶記...?Anyway，想坐得舒服d既話係可以一試既。