沙田強記雞粥 (已結業)

入到沙田當然要食雞粥啦，唔係雞粥就係要食大排擋，這是我一貫對沙田大圍一帶既刻板印象。2條友仔，踩完單車好肚餓周圍搵好野食，但我地係一位九龍人一位港島人，根本對新界就唔熟，經過一輪爭執之下最後由曾經是沙田友既朋友介紹去左食強記雞粥，一出大圍閘問港鐵站職員強記雞粥係邊，點知比佢老點左我地去新強記。當然最後我地都搵到要去既目的地啦！唔使等位，一坐低就見到咁大個招牌，點可以唔食你呀！先黎左一碗重頭戲「招牌雞粥」，分量岩岩好，仲可以叫多幾樣其他菜，粥底本身好綿，不會太稀，雞肉好嫩滑有醃過既咸雞味，但如果碗粥再熱ｄ，相信會更加加分。「紅燒乳鴿」，乳鴿係我地既另一個驚喜，體型唔算大隻，但都可以啖啖肉，外皮紅燒得好香脆，內在咬落好juicy，唔會好乾柴既感覺，最鍾意點喼汁一齊食，簡直想外賣幾隻番屋企做宵夜！「太和骨」，雖則唔知咩係太和骨，但好奇心推使下點黎試下，食落同京都骨既味係冇分別，但酸酸味味，夏天食都幾開胃。「椒絲腐乳炒通菜」，相比平時出街食個d既椒絲腐乳炒通菜，佢lee間既腐乳味比較淡，味道唔會太重，唔會太死咸，可以食得出菜既菜甜味，我鍾意佢lee間腐乳分量炒得岩岩好，好適合唔會太重口味既人食