慢煮工業 (已結業)

一向都好少去旺角太子，覺得人多車多，但係同事介紹吓佢哋去呢一間慢煮工業試吓。可能因為都少去，比想像之中難搵，原來間餐廳係幾間車房之間，但係當你行到去嗰條街都幾難Miss，因為餐廳佈置得非常之有心思非常之靚。當日就叫咗一人叫咗一個set lunch，我就叫咗安格斯牛扒薯條，雖然餐廳嘅價錢親民，但係安格斯牛扒煮得一啲都唔馬虎，食落肉質非常鮮嫩易咬，牛扒肥瘦適中，唔會無啦啦有好大塊肥膏或者筋。薯條炸到金黃香口，多士就加咗少少蜜糖。朋友就叫咗滿蜆肉蝴蝶意粉，本身都唔係好明白咩叫滿蜆肉，嚟到就即刻秒懂。都冇乜試過食意粉蜆肉會多過意粉，雖然平時唔係特別鍾意食湯意粉，但係今次嘅湯真係非常之出色，充滿着蜆肉嘅鮮味，食完都忍唔住繼續飲。另外叫咗一個慢煮伯爵茶啤梨配雪糕一齊食，都未試過食呢種煮法嘅啤梨，有啤梨嘅清甜之餘又有伯爵茶味，雪糕有幾種唔同嘅味道可以揀，我哋就揀咗玄米茶雪糕，味道好新鮮。餐飲用咗Twinings 伯爵茶，飲完再沖多一杯都仲好夠茶味。