Stella's Bar & Restaurant (已結業)

其實都經過呢間餐廳好幾次，不過上次晏晝落場食唔到。附近都係車場，中間有咁樣裝修格調嘅餐廳真係有啲估佢唔到。 今晚我同男朋友每人叫咗個 dinner set，包前菜，主菜同飲品。 前菜我哋揀咗 caesar salad 同 “溫泉蛋，雜菌，松露汁”。Caesar salad 咪就係一般果啲沙律囉。 溫泉蛋郁郁下好過癮，篤穿個蛋黃睇住啲汁流出嚟果下又好治愈，配埋個松露汁好正呀。我最鍾意松露汁架啦，佢果陣香味真係冇得頂！ 主菜一個叫咗 pasta，另一個叫咗黑毛豬扒。個 pasta 好普通，食完都無乜印象。塊 juicy 嘅黑毛豬扒係陪薯蓉嘅，仲配過點點地嘅汁。醬汁好似係蘋果味（我都唔太記得），酸酸甜甜咁幾開胃，同黑毛豬係襯嘅。 見佢個 menu 有幾多特飲同埋 cocktails，賣相好似唔錯，同出面嗰啲唔同。不過我哋之後約咗人哋飲嘢，所以就無叫 cocktails 啦！另外甜品就冇乜特別啦，反正下午茶啱啱先食完甜品，結果當然係無試佢嘅甜品喇。 呢餐飯最吸引同印象深刻嘅經驗係 “溫泉蛋，雜菌，松露汁”，價錢 reasonable。其實荃灣唔多西餐廳，所以呢間係值得再返嚟嘅。