Yagura日本餐廳 (已結業)

買左團購放題 $308+10%，急不及待weekend去食，一行三人，我個人比較喜歡環境食材較好的日式餐廳，因為吃刺身這類型食物比較安心，這裡就符合我要求，可能團購價比其他高，但食物，環境及服務一定比百幾蚊嘅冇得比。首先講下沙律同飲品，我係沙律精，超愛新鮮蔬菜，呢到個豆腐芝士沙律配芝麻汁超正，菜新鮮唔會是但比d生菜你就算。除左呢款重有四款沙律冷盤選擇。至於飲品有清酒，梳打同汽水，最讚係汽水係玻璃樽上，重係大支。我就飲左清酒同橙梳打，係滿意嘅！再黎係主打刺身，厚身，新鮮，有光澤，雖然唔多款選擇，但主要嘅刺身都有齊-帶子，油甘魚，三文魚，希靈魚……係高質素。跟住係串燒，燒蝦係正到爆，我地三個人食左十串，冇得輸，大大隻去左蝦頭又鮮甜。燒雞翼同牛舌都係好正，係熱辣辣咁上，比起出面串燒店更好。其餘重有炸物，麵食，壽司手卷，火鍋都ok,只係炸物味道仍須改善。最後甜品係豆腐同綠茶雪糕，呢個甜品一定要留肚食，香濃夠滑，豆腐雪糕簡直好似似自家製豆漿一樣咁有豆香，三個人食八個雪糕，驚人我已買左第二轉團購啦，希望可以保持水準唔好令我失望。