飯丸屋 (D2 Place TWO) (已結業)

之前見有人話荔枝角係美食沙漠，最近工作需要去多咗嗰頭，慢慢發現其實都有好多好西等我哋發掘。就好似今日想買啲輕便啲嘅外賣，去到D2 Place比我見到呢間味道賣相都非常精美嘅飯丸屋飯糰專賣店。所有飯糰都係即場新鮮製造，望住佢整嘅過程都幾興奮又期待。買咗兩個餐，一份自己食，一份幫朋友買。我就揀咗日式炸雞飯糰配黑糖豆漿。有相為證，啲炸雞漲啵啵大大粒，肉哋都好厚實，仲有午餐肉同蛋做配料，每啖都好滿足。另一款就叫咗明太子干貝酥飯糰，賣相同樣靚到忍唔住要打下卡，好大件嘅干貝酥，暖笠笠咁食落口真係好舒服。明太子醬嘅味都好濃郁，同飯糰本身非常夾。黑糖豆漿同黑芝麻豆漿用細杯裝真係超級可愛，cute到忍唔住要影多幾張相。兩款嘅賣相都有漸層效果，睇落非常吸引，味道同樣無得彈。薯條炸得好筆挺爽直，咬落口好乾脆，配埋明太子醬一流！麻糬波波有兩款口味，普通甜番薯同紫薯兩種顏色。食落去嘅口感一致地外脆內軟，係好正嘅小食。