常樂素食 (已結業)

呢排食得太多肥膩野，決定今日同朋友去食齋！因為銅鑼灣食齋嘅選擇唔多，咁今次就嚟咗呢間試新野。一想到去就比左右兩邊嘅黑板吸引着，上面都寫住餐廳最近熱門及推介嘅菜式，多種菜式琳琅滿目，令人目不暇給，突然間都唔知食邊樣野先係自己想要。我哋揀咗三樣菜色分別係肉燥飯、咕嚕肉同螞蟻上樹。咕嚕肉外型同真嘅非常相似，當然唔好要求真係有兩舊骨扮埋俾你睇啦，顏色都夠誠意，唔會變左鮮紅色，而且仲有唔少既腰果。肉燥飯飯底份量充足，有好多冬菇粒粒、素肉粒，D汁送飯一流。雖然餐牌上寫住落左藥包，但完全唔覺有任何藥嘅味道。螞蟻上樹一黎度已經覺得份量十足，大大碟粉絲，侍應仲問我地要幾辣，第一次食梗係唔好亂黎，試一試個小辣先。粉絲好入味，唔會話勁淡，味道又唔差。兩個女仔食呢個螞蟻上樹，食完真係會好飽。