茶記冰室 (已結業)

近日愛上邪惡食物「炸雞脾」，難得今日可以輕鬆一下走到葵涌街市食個下午茶，同事係葵涌街坊，大大推介剛在5月轉手的『茶記冰室』，食物質素好，佢話性價比極高，梗係要親身體驗下。來一個輕鬆休閒下午茶，炸雞脾配薯條都係$35，加3蚊有凍飲，我叫咗杯凍檸檬茶。嘩～炸雞脾超大隻，熱辣辣，切開後仲出煙，雞皮脆肉質滑，仲帶少少肥膏，忍唔住一路食一路讚，真係好好食呀！至於薯條係厚身扭紋的，啖啖薯仔肉，加上淮鹽，帶少少辛辣，非常惹味。檸檬茶都唔弱，檸檬新鮮，茶底夠茶香味，確實好飲。另外同事介紹我必點小菜，我哋就叫咗苦瓜煎蛋，份量十足，夠雞蛋味，苦瓜煮得剛剛好，很不錯。蒜蓉炒芥蘭都好香口，芥蘭新鮮又翠綠，入口幼嫩，夠鑊氣，正呀！其實唔只下午茶抵食，連午餐、常餐、炒粉麵飯同小菜都咁抵食又好食，值得變成大家心目中的茶餐廳新寵兒。