麻辣風雲 (京都廣場) (已結業)

食麻辣嘢嘅舖頭喺香港越開越多，本身唔太食辣嘅朋友都比我調校到無辣不歡。今次晚市嚟到銅鑼灣樓上嘅呢間餐廳，都幾多人食。叫咗三個主菜：宜賓涼拌冷麵，黃金蝦，辣子田雞黃金蝦係大部份港式嘅餐廳都會有嘅菜式，因為香港人太鍾意食鹹蛋黃，所以點整都好好食。蝦肉鮮甜，蝦殼處理得好好，大大隻份量都足，好適合餸飯。辣子田雞係辣子雞嘅變奏版，田雞肉炸得好香口，麻辣叫咗小辣，味道唔會太重，鍾意食田雞嘅唔好錯過。可惜整體都比較多骨，調味鹹咗少少，所以唔怕食多骨食物同重口味人士必點。重頭戲係主食嘅冷麵，味道有少少似帶咗我返四川。麵嘅質地比較硬身，有好多配料：花生、芝麻、蔥、海椒油，咬開啲花椒有一陣陣麻痹嘅感覺，好過癮。雖然有啲香料食唔出係咩，但係食完嘅香味喺口腔入面後勁幾強烈，餘韻悠長。因為整體食物比較重口味，所以嘢飲都叫咗幾杯水蜜桃雜果茶，好解渴。椰汁沙冰就比較解辣，最後都係要叫多支津路，清一清個喉嚨。見到餐廳午市套餐好似抵食啲，下次lunch再嚟試過。