肥姐麻辣餐廳

營業中

休息中

今天剛剛去完荃灣shopping，行過公園附近見到肥姐麻辣餐廳，因為都幾耐未食過啲勁辣嘅嘢，所以就入去試試；入到餐廳坐喺卡位，坐位都好闊落，見肥姐好熱情咁樣招待啲賓客氣氛好融洽；我和朋友就點咗三個招牌菜；就係辣子雞，口水雞同埋麻婆豆腐，再加支啤酒，啤啤佢。開胃菜就嚟咗個送嘅麻辣蠶豆同埋牙菜，辣辣地都真係幾開胃，跟住就喺一個用鏟做碟，上嘅辣子雞，睇個樣都好特別，面頭鋪滿滿的辣椒，好有氣勢，食落真係唔錯，有啲雞炸過，比較脆口，辣度亦都相當強勁，絕對推介；口水雞嚟到時，真係好似啲口水浸住啲雞，食落啲雞好滑，同埋好有雞味，啲青瓜亦都好入味，不妨一試。跟住個麻婆豆腐，啲豆腐好入味，好滑，真係食到唔停得口，支森堡啤，有驚喜，飲落唔錯喎，見佢平平哋試下，但係又冇苦味好清涼。一個出曬汗，熱辣辣嘅晚飯！好水冷氣都勁涼。