Bingo & Cook (駱克駅) (已搬遷) 新店位置

難得多人又係時候食韓菜，雖然又要限時唔能夠邊食邊傾，但只有人多先可以試多幾款大大份嘅韓菜~餐廳樓底高，闊落好坐，既有近住落地玻璃嘅四人枱，亦有梳化卡位。啖啖鮮西柚嘅酸澀味，血橙色嘅鮮果米酒賣相吸引，不過米酒就唔夠重手，飲落喉嚨微暖，酒味唔濃。如果嗜酒之人可以考慮其他飲品。士多啤梨沙冰望落唔大杯，但因為以鮮果同yoghurt打成，飲落會飽肚。重本咁用yoghurt而唔係乳酸/奶，味道更天然唔膩。鍾意辣嘢嘅人唔可以錯過呢個彈彈麵。幫原隻魷魚打完卡就會有waiter幫手剪開魷魚，服務周到。彈彈麵有啲通透，比粉絲更有韌度。醬汁味濃，入口係甜椒味，鮮辣椒嘅辛香慢慢滲出，雖然唔係勁辣，但呢重富層次且源自食材嘅甜辣味相信唔少人都會鍾意。食過唔少韓式煎餅，佢哋都係以面皮為主，雖然味道都唔錯，但滿佈韮菜嘅煎餅就更得我心。可惜牛肉唔太多，幸好韮菜味夠搶，煎餅唔會只有粉味。最後嚟返個甜辣醬炸雞。食得出甜辣醬係以鮮辣椒調成，唔似一般店舖只用現成醬炮製。炸雞脆皮好薄，所以冇油味。