碗碗香 (已結業)

每星期點都要有返幾日食辣野，今個星期日就去咗呢間碗碗香。之前無意中喺OpenRice search到呢間四川貴州辣辣粉，就去試一試啦。上一次試咗紅燒牛肉粉，原本係想叫牛肉麵嘅，店長一聽到我哋想叫牛肉麵就極力推介呢度嘅牛肉粉，佢話喎，呢度嘅粉係你出邊食唔到嘅好滑架試吓啦！一試冇死嘅，就好爽快叫咗紅燒牛肉粉啦！點知原來呢間嘅紅燒牛肉粉係唔辣嘅所以就有啲失望。所以今次再嚟就要試一試個紅油牛肉粉。紅油牛肉粉（中辣）呢度嘅紅油牛肉粉湯底調得幾好，唔太鹹，好香，好夠麻辣。牛肉粒方面好足料，一碗大概都有成六至八粒，炆得好入味，好林，真係幾唔錯。但係不足嘅係，廚房阿姐唔知聽左邊個人嘅意見，啲粉煮到冇上一次咁滑，仲半生熟。想食死人咩。啲粉一啲就煮到原本咁滑，一啲就未煮熟，硬柴柴。諗住硬嗰啲浸一浸都林啦，點知世事邊有咁簡單。半碗都係半生熟。。。。希望老闆識醒目啦⋯⋯希望下次去食唔會咁啦，難得個湯底幾好味。