燒皇燒烤雞煲專門店

營業中

休息中

早前去上水探朋友，朋友帶我去佢屋企附近的燒皇燒烤專門店食雞煲，在上水港鐵站過去要10分鐘左右，唔熟路的我用地圖帶路都易搵到，招牌以火燒的圖案作底，一睇就知夠晒熱辣辣，不過除左麻辣雞煲之外，仲有椰子雞煲、藥膳雞煲，小朋友都啱食。牆上多款餐牌介紹，仲有是日海鮮和必食推介可以點選，食物種類繁多，諗左好耐都係參考openrice 食評，好多人都大讚椰子雞煲，一定唔會中伏。雞煲以外仲有多款串燒可以點，我地怕太飽都係食完先再決定。椰子雞煲果然係必食之選，用上新鮮椰子仲有其他滋補的配料，椰子香味遠遠都聞得到，頭啖湯有清甜的椰子味，加上紅棗和雪耳，好耐無飲咁正的湯啦。食完雞之後，我地仲有新鮮鱔片，娃娃菜和響鈴，清清地好啱口味。最後個肚仲有位剩，叫埋佢焗蠔試一試，新鮮生蠔加上蒜蓉和辣椒仔，蠔肉肥大肉厚，食一隻真係唔夠喉，唯有下次再食，睇返資料原來依間店仲有另外2間晌荃灣同新蒲崗，下次經開要去試下。