潤一潤甜品屋

營業中

休息中

唔少餐廳因為農曆新年而休息，就連自己一直都想試嘅陳公館都唔例外😣，所以沿路搵其他甜品店，最後嚟到呢間農曆年期收加一嘅糖水舖。桂花綠豆仙草配芋薯雙圓$49普通仙草都會配紅豆，但小店就配綠豆，兩款屬性都偏涼，一定好下火😂不過，其實唔駛擔心會涼過頭，因為仙草好細舊😐食落幾滑，但偏甜。綠豆沙加入海帶絲同埋我最愛嘅臭草。芋圓三色口感煙韌，但食唔出芋/地瓜味。黑芝麻湯圓有三小粒，芝麻味濃，甜度可接受。另外仲有舊芋頭同雞蛋黃，用料豐富。熱喳咋$22由於屋企人唔中意椰奶，所以揀左加花奶。喳咋質地杰身，但唔係因為豆爆開嘅沙沙口感，而係店家加左西米，西米嘅澱粉令喳咋變杰，食落似埋左芡，我地麻麻地呢個質地😶。楊枝甘露$35小店用上大西粒，食落幾有口味，整體味道正常，但由於最近喺粉嶺聯和墟食左一碗幾高質嘅楊枝甘露，比較之下呢個有少少遜色。牛奶桃膠椰皇燉奶$49齋睇個名都覺得好滋補😏燉奶啱啱熟，好滑溜，奶味唔算好濃，甜度適中，我見好幾位食客都點佢。