必勝客 (已結業)

同朋友喺MK做完嘢後決定食埋飯先走，不過林林種種一時之間真係諗唔到食乜好，最後個個好似好耐無食過Pizza，就去Pizza Hut回味吓。電視近來大賣「芝脆堡壘批」廣告，難得嚟一次又唔想諗食咩，所以就直接叫咗「芝脆堡壘批4人套餐」。套餐有四杯餐飲，可以選平時咖啡、奶茶，都可以選擇無限添飲嘅汽水。餐湯都係基本嘅「紅湯」意大利菜湯同「白湯」蘑菇忌廉雞2款，不過味道相當一般，而且唔算熱。煙三文魚凱撒沙律 ，份量不多不少四個人剛好，煙三文魚味道唔錯，配上蔬菜同法式硬飽條口感豐富清新。酥脆蝴蝶蝦 ，睇落幾靚，但味道好一般，無咩蝦味，只FEEL好炸野嘢嘅脆感同熱氣。秘製雞槌 ，味道香口惹味，帶少少辣，比炸蝦好得多！大蝦帆立貝芝脆堡壘大批 ，皮厚料少，雖然係特別出品，但味道真係好一般，只在份量取勝。意式鮮蝦蜆肉焗飯 ，極酸！而且有生米，完全入唔到口啊！雞肉煙肉意粉配拿破崙汁 ，見到拿破崙汁以為唔會出事，點知都係撞咗，兩碟主食都係茄汁，酸到喊出嚟！太耐無食，始終都係覺得意粉屋好得多，Pizza Hut？都係Party時叫外賣算。