泉昌美食 (已結業)

同事一直推薦呢間小食店嘅臭豆腐好味，不過收工去到都收舖！今日放假，特登行去！晚上6點幾，一條後巷門口嘅舖仔，全間舖做咗廚房，炸臭豆腐唔算臭，不過油煙好勁，後巷整咗啲面壁位比人坐低食，不過後巷環境就差啲！先去廚房位買食物，枱面好高，好似押店二叔公櫃臺，男店員無理秩序，邊個出聲就招呼邊個！因為我比幾個菲律賓小姐搶閘落單！個男店員都無理！男店員按單執藥！我堂食就同碟！加張油紙放好食物！辣魷魚（$12）加了少許咖哩汁，魷魚好深色，奇怪係凍嘅！啲汁炆得入味，咖哩汁好油，味道香濃！醬汁唔係好辣，魷魚有咬口！口感好味！如果熱啲就更好！臭豆腐（$12）桌面有豆瓣醬同甜醬！可以自己加！蜂巢面豆腐卜卜脆，入面挺身唔乾，其實唔臭！只有微微臭味！豆瓣醬好鹹，有好多辣椒皮，甜醬正常！味道ok!男店員雖然唔管秩序，不過態度正常，會問埋我要不要咖哩汁！另一個炸食物嘅婆婆店員就好燥！啲客行開啲比佢鬧（我無在佢個位買嘢，所以無事）食物ok不過唔驚喜！