茶木‧台式休閒餐廳 (已結業)

之前搭自動扶手電梯見到開咗間茶木已經想試，但食晏成日都排長龍，咁啱今日同朋友響中環活動，當然要嚟試一試啦！星期六未夠十二點嚟到唔駛等即有位！ 黑糖珍珠奶茶(要求少奶少甜)($38)分量大杯，飲落奶茶順滑，不過茶底似乎唔夠濃，覺得都仲係奶嘅比例較多，甜度的確有減少到，至於珍珠都算Q嫩又唔會太甜。 我同朋友都係心鎖紅燒牛肉麵($88)，只係喜辣嘅我湯底就要香辣！湯底好香濃帶點微辣更加令我一啖接一啖，飲湯仲多過飲杯奶茶！加上酸菜蔥花更加香口。牛腱肉都幾大舊，一碗有3－4舊左右，牛肉肉質紮實，但咬落唔會韌，覺得好綿軟，而且筋肉相隔，食落有D膠質，大愛！！！麵條方面都係我喜愛嘅粗麵條，有D接近刀削麵嘅感覺，食落有彈性，即使食到尾D麵都唔會浸到爛碎，讚！湯裡嘅紅白蘿蔔都煮得幾好，味道鮮甜又唔會炆都蓉蓉爛爛。