TC2 (Tea Coffee Two) (已結業)

我唔係街坊，但係呢間coffee shop我已經幫襯過一次，上次有唔好嘅印象，因為人又多，食物質素可能在因為呢個原因相對差咗……今次去係路過嘅 (又或者再畀多次機會佢啦!)。時間係佛誕假期下午兩點多鐘 ，一走進去，唔知係咪因為假期嘅關係，人比較小，店員親切地安排我哋上到2樓坐低。地方闊落人少咗，感覺自然係舒服馬想點個是日午餐：包括有沙茶醬焗龍脷意粉、一個海鮮忌廉湯，同埋我最喜愛的Mocha。上次印象係食物麻麻，飲品ok但人太多坐得唔舒服……今次嘅感覺有改善，冇人騷擾同食物、飲品質素保持水準。Mocha上面寫住I love holiday，配合今日嘅假期 ( 不過如果上面要加cream要加兩蚊……)。上次冇試過嘅湯今次試過後，感覺超讚！呢個忌廉湯配上蒜蓉包嘅海鮮湯，有濃沃嘅海鮮味，上面加咗香草配合埋蜆肉、蟹柳， 將整個海鮮味帶出；蒜蓉包烘得啱啱好，香口之餘仲有一種牛油香味，配合呢個湯好好味。龍脷意粉配沙茶醬絕對冇問題，唯一可惜嘅係意粉本身，應該係預先整定嘅，要改善！整體嚟講 ，呢個地方啱曬飲個下午茶、傾計聚腳，我相信我會畀多次機會，睇睇佢以後有冇改善