旺記冰室 (鴻輝大廈B座)

營業中

休息中

今日返工放lunch，心血來潮想食滑蛋叉燒飯，諗起之前食過灣仔嗰間旺記真心唔錯，同一款滑蛋叉燒飯，重蛋味（標榜用日本蛋)，叉燒又足料，當日配熱奶茶，留下一個深刻嘅印象。雖然嗰時要同啲OL爭排隊，返工時間食$50-60一碟飯唔算特別抵，但勝在輪候時間唔太長，上碟時間又快，灣仔區嚟講性價比真係唔錯！幾年之後有旺角分店，今次係我第一次去，感覺好似專做遊客生意，價錢同灣仔一樣，但飯上面嘅蛋已經冇以前咁厚實同有蛋香味，叉燒又冇咁足料，叫咗杯熱檸茶，不過不失。見到隔籬枱內地遊客嗌咗蕃茄午餐肉牛肉通粉、滑蛋叉燒雙拼蝦飯，但就食淨晒啲午餐肉，唔使嗌都知應該唔太好食。不過值得一讚嘅係，侍應個個普通話都唔錯，服務態度還好，餐廳環境乾淨企理，冷氣足夠，星期六午飯時間唔洗排隊，食完飯坐咗陣冇即刻趕我走👍🏻臨走前喺門口遇到有內地客要張10人枱，職員都馬上安排俾佢。今次食完其實有啲失望，因同區仲有好多茶餐廳選擇，例如光榮冰室(滑蛋叉燒飯- $48)、蘇杭冰室等等，感覺其他CP值更高，食得呢間嘅建議去返灣仔。