金田家 (已結業)

雖然老夫老妻，但情人節都係要慶祝既，唔想做水魚就梗係唔揀食西餐，嚟食拉麵！英雄所見略同既情侶都幾多，排左半個鐘隊終於到我地入座。揀左豚骨拉麵同黑豚拉麵，兩碗最大分別係叉燒，前者係以五花腩位切成薄片，後者則用上偏瘦既豬肉部分。麵係幼身既，可以根據自己喜愛揀選硬度，湯係濃郁豬骨味，整體嚟講係一碗中上水平既拉麵~最估唔到係小食都幾有水準，唐揚炸雞有4大塊，炸到外脆內嫩，肉汁juicy ~好好食！男爵薯餅有2塊，分別係牛肉薯餅+紫薯栗子薯餅。牛肉薯餅同日本街頭食到既味道係一樣，咬開鬆脆既外薄，入面係牛味濃既creamy 薯蓉，對比既口感令人好食到停唔到口。紫薯栗子薯餅就比較少見，中間夾雜一粒粒栗子，又係另一番好味。