我的意大利廚房 (已結業)

Lunch time黎到灣仔呢間意大利餐廳食飯，因為我地一行9個人，所以預先book好左枱。黎到發現餐廳原來有兩層，好大，所以仍然有好多位淨。Lunch set價錢由$118至$278不等，我就揀左個$138餐，主菜係特色香辣雞扒 (Chicken Devil Style)。首先上菜嘅係自家製麵包，焗得外脆內軟。除左橄欖油同醋之外，佢仲有下面張相右邊嘅醬俾你搽。個醬幾好味，酸酸地但唔會酸到食唔到，仲有啲蒜蓉味添。我嘅餐湯就係mushroom cream soup。佢好足料，有好多蘑菇亦幾creamy。即使佢有重蘑菇味，但又唔太鹹，值得一讚！去到食主菜喇！薯角未炸至脆身，比較淋，麻麻地，但薯角上面落左啲粗鹽，幾特別。沙律就冇乜salad dressing，適合健康人士。至於主菜香辣雞扒，都算中上質素。佢個辣醬都幾辣，但又未至於辣到食唔到。辣得黎鹹鹹地，味道好豐富，幾好味。而個雞扒就煎得幾香，配搭辣醬幾襯。雖然塊雞扒唔夠嫩滑，但整體上都ok值得一讚嘅係佢下面呢個設備，令你吱檸檬汁唔洗整污糟隻手，幾貼心。去到甜品，我已經好飽喇，證明佢食物份量都幾大。甜品係芒果布甸，唔太甜，亦有芒果肉，唔錯。