樂舍 (已結業)

買開日本傢俬就會知道，巧明街一帶可以話係集中地。 最近個個禮拜都嚟巡舖，無意中發現同一棟樓原來有餐廳，就嚟試吓。美國牛腹扒 ($168)見到人哋啲相好吸引，果然冇失望。 牛腹扒燒得啱啱好，嫩紅色好有肉汁，仲有啲炭燒香味，媲美平時晚市幾百蚊靚牛嘅份量同質素，性價比好高。 牛扒同香草汁好夾，薯條亦都新鮮炸起好香口，自己食晒呢個lunch set真係好滿足。西班牙黑毛豬叉燒飯定食 ($128)超厚切叉燒都未夠，我其實一眼睇中個飯上面放咗隻蛋，撈蛋汁食一流。 叉燒估唔到真係做到燒臘舖嘅水準，半肥瘦夠軟腍，仲有少少窿邊，唔知點解配埋個飯有少少日式嘅感覺。 欣賞個飯仲配左牛蒡漬物，如果係度返工，呢餐會係上班族短暫嘅小確幸。當日有啲凍坐唔到戶外，有機會再嚟就好喇。