雪龍湯 (已結業)

我好少寫食評，但今次真係正宗湯死牛，唔寫唔得 ~ 事關食咗一碗淨係有蘿蔔味嘅雪濃湯！ 事源一路都想試呢間雪濃湯，因為佢話係正宗咪試囉！本人去韓國一年都起碼6,7次，正唔正宗一食就知。首先由公司行過去都起碼15分鐘，都諗住唔緊要啦，好食就ok. 話哂午飯時間應該都好多人但都係得兩張檯有人 ....已經開始擔心，但睇睇menu, 價格都幾貴，所以可能因為咁無咩人。佢有 set lunch嘅，但唔係好吸引，所以睇吓其他非餐類食品。一場嚟到就梗係要試雪濃湯啦，一睇價錢，嘩$298!! 都算啦， 一次半次食豪啲。上菜啦，個湯白雪雪，應該ok. 第一啖 ..... 點解咁嘅味？ 一啲牛味都無，只係甜，再撈吓啲料，嘩！ 十幾舊蘿蔔係底，啲牛展味好怪 - 中伏！！ 我都諗住算，一餐半餐 ...但都忍唔住問個侍應用咩煮，佢當然話用牛骨啦。但我問佢，咁點解無牛味，佢竟然答我韓國嘅雪濃湯係屬淡味，落咁多蘿蔔係要迎合香港人口味！！ 我當堂O咗，你蝦啲未食過韓國菜嘅人都算，香港人會唔會想俾300蚊飲你一碗車仔麵湯底呢？唔會再嚟囉！