時代冰室 (公主大廈) (已結業)

難得攞咗日假，就約咗朋友喺佢公司附近岀嚟食飯，佢話有間冰室想去試吓，喺佢公司大概十分鐘路程，喺地鐵站對面，於是就約咗12:30喺門口等。去到先知原來約咗喺「時代冰室」，唔怪得朋友咁想嚟食，因為佢係蕭若元嘅超級粉絲，聽咗佢電台好多年，最近又喺股票贏到錢，而啊蕭生好似有收購時代冰室大概20%權益，呢餐就當係多謝蕭生啦。坐底嗌嘢食，我叫咗個L10「蔥油自家叉燒伴三眼仔煎蛋飯」而朋友就好似叫咗個肉燥飯，餐飲例牌都係杯走甜嘅凍檸茶。另外提一提就係見到餐牌上面寫住12月至1月，所以可能下次嚟食嗰陣會有好多嘢唔同咗。叉蛋飯等咗幾分鐘就到，叉燒似係自家制作，同岀面燒味買嘅叉燒有明顯嘅分別，蔥油亦唔會太油膩，加埋三隻荷包蛋撈埋一齊食好滿足。可能遲啲等佢餐牌轉一轉之後再嚟試埋其他嘢食。