歐意餐廳 (已結業)

我係經朋友介紹去食呢間離我屋企幾個站嘅餐廳，估唔到我人生嘅第一次就獻左比佢，我指嘅係食評。我朋友極力推介嗰到嘅三重奏芝士Pizza-$68同公司三文治配雜果沙律-$46。果然古人誠不欺我，信兄弟嘅包冇錯，我嗰日真係食到舔舔利。我特別鍾意佢哋嘅芝士Pizza，真係好鬼邪惡，芝士又多，又拉得好長，芝士味又好Rich，真係不得了，令人欲罷不能。佢個Pizza都幾大個，一個人都食唔曬，建議各位如果去食要自備食盒。而嗰公司三文治配上嗰嗰沙律，真係好啱三點三嘅時候嘆下。三層三文治夾上生菜蕃茄火腿同雞蛋，營養均衡又好食，面包烘嘅火候啱啱好，唔會太乾，雞蛋夠曬鬆軟。最令我驚喜嘅係個沙律，佢有加左青瓜入去，成個口感同味道十分嘅清爽清新，十分嘅啱我口味。呢間舖頭比足我十分嘅驚喜，睇黎下一次就到我介紹比其他人，支持。