西貢越南餐廳 (已結業)

年年都有買花回家及公司擺的習慣，年廿六晚，就同太座去維園行花市，順便亦趁趁熱鬧。我們由天后方向入維園，先在那邊找吃的。市道真的好，無論中西大小餐廳都是一位難求，途經這裡，見剛好有人走有二人位，就立即閃了入來坐下。幾肚餓，要了生熟牛肉河、札肉撈檬、小吃併盤及芥蘭一碟，飲品要了凍滴漏咖啡及三色冰。人多，但食物都好快上檯。牛肉河湯底都算幾甜，唔使講當然有味精，算係咁。生牛肉較為嫩滑，熟牛肉則幾韌，如有下次都係叫生牛肉就算，而札肉撈檬都過得去；小吃併盤要70蚊，在這裡算係貴價食品，份量都不少，有春卷、豬肉蝦片、札肉、炸札肉及粉卷，兩個人吃是相當豐富的了。豬肉蝦片不錯，春卷亦脆卜卜，蒸粉卷都交足功課，如果餡料能有多點沙葛就更好。札肉平平無奇，不過炸札肉就有粒粒黑椒在內的，幾好味；芥蘭幾特別，條條都是芯的部份，有一大截是花來的，偏偏我不喜吃菜花，吃一截棄一截，堆了一大堆花在碟底。滴漏咖啡不夠香又不夠甜，可以更好。三色冰更是「求其」，看來飲品是這裡弱項之一。阿姐招呼不算很差，但地方實在淺窄，坐得很迫。埋單171蚊，吃得飽一飽，不算貴。