越南站餐廳 (已結業)

星期六同老婆去街街，走左去越南站食粉。去到大約一點幾，一條街靜英英，係得呢間舖頭外面企晒人，好彩門口有把大風扇吹下，如果唔係熱死人，如是者行行企企大約四五個字就有位。之前有版友話呢間野服務麻麻，我又唔覺，坐低就有人問我地要水定要茶，仲要唔該前唔該後，禮貌都唔錯丫，可能佢地睇左之前版友留言有改善掛。講返食野，我同老婆叫左一個特別粉，一個咖喱牛腩配法包。先講特別粉，湯香，粉滑，o的湯唔知點解有o的似九記，但就冇咁濃冇咁油，好好味，侍應仲主動問我地加唔加湯，我地直頭"不"左成碗當湯飲。至於配料方面，牛肉幾好，生生地有牛味，牛丸就唔夠尖沙嘴德發咁爽口，但都ok，牛柏葉少左o的，牛展略韌，最好都係個湯底。而個咖喱就麻麻啦，始終都係欠左o的香味，雖然有我至愛既牛筋，但唔入味，如果再去唔會再叫。老婆就話鍾意佢個粉，下次去會叫兩碗粉食，加多個炸田雞髀。