王家沙 (已結業)

呢度以前都寫過食評，評價只係一般，估唔到今次幫襯食午飯，又有d意外驚喜喎。話說平安夜的下午茶時間兩點幾鐘來到旺角呢頭，發覺食西餐的地方好多都做緊午市聖誕餐或者無做下午茶，暫停營業準備晚上「劏客」，咁啱來到「王家沙」附近，見d午市套餐唔係貴，好似都幾多嘢食同選擇，於是即管再去試試水準有無高番或下降啦！同老婆仔叫左兩個套餐，主菜要左一個「咕嚕肉」、一個「炒鱔糊」、冷盤就要了一個「皮蛋豆腐」同一個「香漕豬手」。都話左有意外驚喜，餸菜上桌後，發覺四碟的味道都唔錯，就係味道濃了一點（莫非果真是上海菜濃油大醬乎？）。豬手有酒香；咕嚕肉甜酸度適中，十分開胃；鱔糊份量不少，味道亦佳，送菜飯同吃，不錯不錯！加埋冷熱豆漿各一杯，不收加一，埋單只係$90，算係幾抵，都係一個開飯好地方呢！