御苑皇宴 (已結業)

Mega呢層中菜最有趣嘅地方就係除咗稻香，其他幾間我都UP唔出個名，所以食中菜就係咁，如果無一間食開嘅，又或者無幾款出名嘅小菜坐陣，好難留住人流。今晚我地都係抱住求其搵一間食嘅心態入座，但整體質素都唔錯喎。最吸引係呢個上湯龍蝦芝士伊麵！佢雖然無其他酒樓咁用芝士蓋面，但係每一啖都有好濃嘅芝士同牛油味，而且主調都係上湯，所以食落去都唔會好油膩。龍蝦又爽又彈牙，真係好食！雲吞雞略嫌有點油得制，不過雞味好濃，而且份量好多，每人分到兩碗有多，仲有半邊雞食。金銀蛋白菜仔就點都好食架喇，份量都唔算少。但個薑蔥雞就唔得喇！我一心諗住會係爆得好香口嘅薑蔥雞煲，但雞件完全唔上色，而且薑蔥味入唔到舊雞度，味道好單調。呢道口水雞就唔正宗喇，用上大量豆豉，味道雖然好，辣油泡過啲雞，但你就唔可以話佢係口水雞囉。套餐送嘅桂花糕就為成個晚餐作完美嘅句點，桂花清香可去油膩。