Tipsy burger (已結業)

放假去左港島行下，見開飯有介紹過呢間漢堡店特意黎試下佢，地店唔難搵嘅，附近勁多野食，但唔知係咪長假期唔開門呢？條街都幾靜唔多人食野喎。漢堡店當然係賣漢堡包啦，但呢店啲包有兩類型，普通型同有酒精型，基本上每款包都有呢兩個組合。除左漢堡包，仲有幾樣小食，飲品就暫時得汽水，有得酒精漢堡，遲下應該有埋酒精飲品掛？今日呢就試左雙重芝士和牛漢堡，正如包名，入面真係爆芝士，多到漏出黎，芝士味十分強烈，愛芝士人士一定鍾意啦。塊漢堡扒好多肉汁，食落係香口嘅，不過美中不足有少少筋。個包軟綿綿，又有生菜蕃茄咁，其實真係好味噃，唔知有酒精版會係咩味呢，下次黎試下先。薯條即叫即炸好香脆，仲係粗身條條黎，薯味會重啲㗎，搵個杯咁插起身又幾好睇，份量仲唔少添。飲品就有可樂，七喜等，揀左罐+C，純粹因為屋企人好少買呢隻黎飲，本身對呢罐野無乜喜好。人均消費約一百蚊，正常漢堡價啦，不過個包係高質嘅，算係物有所值。