養心殿台式養生鍋 (已搬遷) 新店位置

是日晚餐，同女朋友去養心殿打邊爐撐下檯腳，之前喺荃灣分店食過，覺得同台灣嘅質素唔錯太遠，所以今次再接再厲，不過就去咗旺角彌敦道分店。湯底方面，今次揀咗鴛鴦湯底（白肉酸菜加麻辣），之前有朋友食過，佢極力推介白肉酸菜，所以我哋即管試下係咪佢講到咁正！白肉酸菜湯底入面仲有寬粉，而且麻辣鴨血可以追加一份，真係唔怕食唔飽！點咗極上雪花肥牛，炸午餐肉，蟹棒同鮮甜三蔬，仲有沖繩黑糖烏梅汁。肥牛雪米同牛肉分佈均勻，牛肉放落麻辣湯度特別入味。炸午餐肉即食又得，放落湯又得，而且仲係厚切，啖啖肉。蟹棒就記得唔好滾太耐，如果唔係好易散開。三蔬有爽脆嘅秋葵，鮮甜嘅粟米同埋口感爽口嘅山藥，亦即係淮山。至於飲品方面，酸中帶甜，寧舍醒胃，用嚟開胃一流，而且份量又多，值得叫！呢間分店位置非常易搵亦都好方便，鄰近朗豪坊，環境舒適，座位坐得舒服，侍應態度好，反應又快，抵讚！