影片
更多
2017-02-13
5045 瀏覽
我哋幾個人一齊去咗勁嘆燒烤場,呢間燒烤場好似都開咗幾年之前都聽過有其他朋友去過.同我去過嘅燒烤場相比,場地就比較小一啲.一間村屋再加屋外一大片空地,好似去咗人哋屋企BBQ咁,不過都算開揚整潔,場外亦有十幾個車位,方便駕車人士.進場時要俾人頭費等等先可以開爐,之後店員會細心講解一番,佢哋仲有提供厚身紙碟,同埋印咗彩色圖案,幾可愛.我哋晌重慶燒烤同港式燒烤之間揀咗前者,兩款嘅分別在於一個係串燒形式同用於長方形網燒炭爐,另一個就係用燒烤叉叉食物同係坐地式嘅炭爐.人頭費每人包一款飲品,某啲就要加錢轉飲,再加飲品就要額外俾錢.重慶燒烤除咗可以拎串燒食物外,亦都可以拎港式燒烤嘅食物,蔬菜亦都係任意拎,虎蝦,菠蘿,香蕉就按人頭配給.重慶燒烤嘅食物放咗晌村屋入面,全部都係用竹籤串好,拎食物時店員偶爾會特別說明燒烤方法.當日肉類有:牛柳,牛舌,羊肉,豬柳,豬頸肉,煙鴨胸,雞肉,雞軟骨,雞翼. 丸類有:芝士丸,黑椒牛丸,墨魚丸,龍蝦丸. 腸類有:司華力腸,香腸,紅腸,芝士腸. 其他類有:多春魚,鯖魚,日式豆卜,豬大腸,豬腩肉,魷魚鬚,墨魚咀,煙肉卷,肥牛卷. 蔬菜類有:茄子,秋葵,豆角,大蔥,尖椒,日本番
我哋幾個人一齊去咗勁嘆燒烤場,呢間燒烤場好似都開咗幾年之前都聽過有其他朋友去過.
同我去過嘅燒烤場相比,場地就比較小一啲.一間村屋再加屋外一大片空地,好似去咗人哋屋企BBQ咁,不過都算開揚整潔,場外亦有十幾個車位,方便駕車人士.
進場時要俾人頭費等等先可以開爐,之後店員會細心講解一番,佢哋仲有提供厚身紙碟,同埋印咗彩色圖案,幾可愛.
我哋晌重慶燒烤同港式燒烤之間揀咗前者,兩款嘅分別在於一個係串燒形式同用於長方形網燒炭爐,另一個就係用燒烤叉叉食物同係坐地式嘅炭爐.人頭費每人包一款飲品,某啲就要加錢轉飲,再加飲品就要額外俾錢.
重慶燒烤除咗可以拎串燒食物外,亦都可以拎港式燒烤嘅食物,蔬菜亦都係任意拎,虎蝦,菠蘿,香蕉就按人頭配給.
重慶燒烤嘅食物放咗晌村屋入面,全部都係用竹籤串好,拎食物時店員偶爾會特別說明燒烤方法.當日肉類有:牛柳,牛舌,羊肉,豬柳,豬頸肉,煙鴨胸,雞肉,雞軟骨,雞翼. 丸類有:芝士丸,黑椒牛丸,墨魚丸,龍蝦丸. 腸類有:司華力腸,香腸,紅腸,芝士腸. 其他類有:多春魚,鯖魚,日式豆卜,豬大腸,豬腩肉,魷魚鬚,墨魚咀,煙肉卷,肥牛卷. 蔬菜類有:茄子,秋葵,豆角,大蔥,尖椒,日本番薯,韭菜,翠肉瓜,粟米,車厘茄,彩椒,冬菇等等.
飲品櫃都係晌屋入面,另外仲有雪糕同各式玩具可以買嚟食同玩,就好似一間小小嘅士多咁.
屋入面養咗隻 mix咗拉布拉多血統嘅唐狗,八個月大好貪玩,有陣時見到食客仲會吠,不過店員話佢係想人哋同佢玩,冇乜惡意.呢張相係佢俾店員薄責之後影嘅,好似可憐咁.
屋入口附近仲有隻鸚鵡,體型都幾大隻.
呢個就係重慶燒烤專用嘅炭爐.
開初火勢較大,所以店員建議先燒肉類,之後燒蔬菜.燒烤時可以掃燒汁,亦可按喜好灑少少孜然粉,辣粉,椒鹽粉調味,我哋仲額外買咗兜蜜糖,蔬菜就要邊燒邊掃水.爐入面飄出嚟嘅炭屑唔多,但火焰幾猛,食物放上去燒幾燒,反幾反就得,好似比港式燒烤易熟,整個過程都晌度密密食,同埋要好專注咁睇住,一唔留神或唔記得反轉就會燒焦,燒比較多油嘅食物時煙霧仲幾多.
按人頭配給嘅虎蝦都幾大隻,肉厚彈牙.
我哋將所有食物都掃燒汁,味道唔死鹹,都幾惹味.當中嘅煙肉卷鹹香.豬腩肉鬆化唔癡牙.豬大腸就已經預先煮熟,只係略為燒一下就得,外脆內軟腍,亦冇腥臭味.煙鴨胸有油香,不過非常搶火.雞軟骨爽口.墨魚咀,魷魚鬚彈牙.羊肉就微羶唔韌.
然後就去屋後面睇下港式燒烤嘅食物有乜選擇,所有食物都存放晌凍櫃入面,同埋蓋咗蓋,以保持衛生.
除咗有額外嘅厚方包,蒜蓉牛油同原味牛油外,食物種類基本上同重慶燒烤大同小異.
唔同之處在於某幾款食物都係用調味料醃過,例如有黑椒,香草,孜然,咖哩,蒜蓉,柱候同香辣口味等等,仲有比較大塊嘅肉類例如大雞脾,雞全翼,豬扒,羊扒,牛扒,魷魚,金沙骨,鴨腎等等,但就冇標個名出嚟,要憑肉眼去估係乜肉類同口味.
食完一輪肉,係時候食蔬菜.呢度有秋葵,可謂燒烤場少見,燒好後外皮脆而帶韌性,入面變得爽口,對於平時怕食黏黏質感嘅人嚟講比較易接受.原條茄子就放晌爐上燒一陣,再切開同灑啲調味料上去燒一陣就得,食嗰陣茄子肉一絲絲軟綿多汁.日本番薯,店員話已經預先煮熟,燒一燒就得,食落扎實甜香,有啲似我之前食過嘅栗子番薯,仲可以連皮一齊食.按人頭配給嘅菠蘿酸甜多汁,幾消滯.厚方包就可以用嚟自製炭燒版蒜蓉牛油多士.
按人頭配給嘅香蕉,亦係原隻放晌爐上,燒到變黑就可以拎俾店員將佢切開再淋朱古力醬,作為甜品都唔錯.
入夜後場內燈飾亮起,又係另一番景象.呢次我只係食咗重慶燒烤嘅食物,自己就比較鐘意煙鴨胸,雞軟骨,羊肉,豬大腸同菠蘿.
張貼
