拉麵天王

營業中

休息中

好耐之前喺元朗食過一次覺得非常之正，但係再去佢已經執咗。點知原來佢喺紅磡再開番，所以我即刻走去試一試，睇吓有冇走到樣。佢同舊舖一樣都係得四款拉麵可以揀——就係四大天王。我就揀咗一個赤天王試吓。飲咗一啖湯已經知道佢哋嘅水準仍然keep到。因為我揀咗少辣，所以唔會話辣到完全飲唔到湯嘅味道。佢除咗辣味，仲有陣陣豬骨湯香味，層次豐富。麵質軟硬適中，而且掛湯能力亦都非常之好。另外一樣野我好鍾意嘅就係佢個豚角煮，做得非常之稔同埋入味，好好食。整體來講質素同我當年食嘅一模一樣，各方面都處理得唔錯，值得推介。lunch時間都幾多人食，要食嘅話唔建議lunch時間去。